उदयपुर जिल्ला अस्पतालमा संकट गहिरियो, माग पूरा नभए आकस्मिकबाहेक सेवा बन्द गर्ने स्वास्थ्यकर्मीको चेतावनी
शनिबार आयोजित पत्रकार सम्मेलनमार्फत चिकित्सक तथा स्वास्थ्यकर्मीहरूले अस्पतालमा चरम अव्यवस्था, आर्थिक अपारदर्शिता र कर्मचारीमाथि विभेदपूर्ण व्यवहारले सेवा प्रवाह नै संकटमा परेको बताएका छन्।
स्वास्थ्यकर्मीहरूका अनुसार अस्पतालमा फिल्टर, साबुन, सर्फ, गज, पञ्जालगायत दैनिक प्रयोगका सामग्रीको अभाव छ भने केही सातादेखिको अक्सिजन अभावले उपचार सेवामा समेत असर पुगेको छ। प्रयोगशालामा सामान्य परीक्षण नियमित हुन नसक्दा बिरामी निजी प्रयोगशालामा जान बाध्य भएको उनीहरूको भनाइ छ।
डाक्टर कृष्णकुमार यादवले अस्पतालको अवस्था दिनप्रतिदिन जटिल बन्दै गएको बताउँदै माग सम्बोधन नभए आन्दोलनमा जानुको विकल्प नरहेको बताए। यस्तै, निमित्त मेडिकल सुपरिटेन्डेन्ट मुकेश झाले पनि अस्पताल गम्भीर समस्याबाट गुज्रिरहेको स्वीकार गर्दै प्रदेश सरकार र सम्बन्धित निकायलाई पटक–पटक जानकारी गराए पनि समाधान हुन नसकेको बताए। आर्थिक संकटका कारण विशेषज्ञ चिकित्सकले महिनौँदेखि प्रोत्साहन तथा अन–कल भत्ता नपाएको, मेडिकल अधिकृत र अन्य स्वास्थ्यकर्मीका विभिन्न सेवा–सुविधा रोकिएको जनाइएको छ।
स्वास्थ्यकर्मीहरूले अस्पतालको आय–व्यय विवरण सार्वजनिक गरी आर्थिक पारदर्शिता कायम गर्न, आवश्यक औषधि तथा उपकरणको व्यवस्था गर्न र व्यवस्थापन सुधार गर्न माग गरेका छन्। उचित समयमा समस्या समाधान नभए आन्दोलनका थप कार्यक्रम घोषणा गरिने उनीहरूको चेतावनी छ।
