कामधेनु सहकारीमा दसैँको शुभकामना आदानप्रदानदेखि पशु प्राविधिकलाई नियुक्तिपत्र वितरणसम्म
जनचर्चा टाइम्स अनलाइन/ इटहरी । सुनसरीको इटहरी उपमहानगरपालिका–१ स्थित कामधेनु दुग्ध विकास सहकारी संस्था लिमिटेडले दसैँको अवसरमा शुभकामना आदानप्रदान तथा टीका–जमरा कार्यक्रम आयोजना गरेको छ। कार्यक्रममा सहकारीका सञ्चालक समिति र कर्मचारीबीच शुभकामना आदानप्रदान गर्नुका साथै विभिन्न जिल्लाका १९ पालिकामा कार्यरत पशु तथा भेटेरिनरी प्राविधिकलाई नियुक्तिपत्र वितरण गरिएको छ।
कोशी प्रदेशका उद्योग, कृषि तथा सहकारीमन्त्री रामप्रसाद महतोको उपस्थितिमा आयोजित कार्यक्रममा सहकारी परिवारले आपसी सद्भाव, एकता र सहकार्यको सन्देशसहित दसैँको शुभकामना साटासाट गरेको हो।
कार्यक्रममा मन्त्री महतोले कामधेनु सहकारीले कृषि तथा दुग्ध उत्पादनको क्षेत्रमा पुर्याउँदै आएको योगदानको प्रशंसा गर्दै कृषि क्षेत्रको विकासका लागि प्रदेश सरकारले आवश्यक सहजीकरण गर्ने बताए। पशुपालन र दुग्ध उत्पादनलाई व्यावसायिक तथा उत्पादनमुखी बनाउन सहकारी संस्थाहरूको भूमिका महत्त्वपूर्ण हुने उल्लेख गर्दै उनले किसानको हित र उत्पादन वृद्धिका लागि सम्बन्धित पक्षबीच सहकार्य आवश्यक रहेको धारणा राखे।
कार्यक्रममा स्वागत मन्तव्य राख्दै सहकारीका लेखा संयोजक देवीप्रसाद भट्टराईले दसैँले सहकारी परिवारबीच आपसी सद्भाव, एकता र सहकार्यलाई थप मजबुत बनाउने विश्वास व्यक्त गरे। उनले चाडपर्वले सञ्चालक समिति र कर्मचारीबीचको सम्बन्ध प्रगाढ बनाउँदै संस्थाको उद्देश्य प्राप्तिका लागि एकजुट भएर अघि बढ्ने प्रेरणा दिने बताए।
सहकारीका अध्यक्ष यादव ढकालले संस्थाले दुग्ध उत्पादन तथा पशुपालन क्षेत्रको विकास र किसानको हितलाई प्राथमिकतामा राखेर काम गरिरहेको बताए। कृषि क्षेत्रलाई व्यावसायिक र उत्पादनमुखी बनाउन सहकारीले विभिन्न कार्यक्रम अघि बढाउँदै आएको उल्लेख गर्दै उनले पशुपालक किसानलाई आवश्यक प्राविधिक सेवा उपलब्ध गराउन दक्ष जनशक्तिको भूमिका महत्त्वपूर्ण हुने बताए।
ढकालले यसअघि गरेको प्रतिबद्धताअनुसार पशु तथा भेटेरिनरी प्राविधिकलाई कृषि मन्त्रीकै हातबाट नियुक्तिपत्र वितरण गरिएको जनाए। प्राविधिक जनशक्तिको परिचालनले पशुपालक किसानलाई आवश्यक सेवा पुर्याउन र दुग्ध उत्पादन क्षेत्रलाई थप व्यवस्थित बनाउन सहयोग पुग्ने उनको विश्वास छ।
कार्यक्रममा मन्त्री महतोले सहकारीका अध्यक्ष ढकालसहित सञ्चालक समिति तथा कर्मचारीलाई टीका–जमरा लगाएर दसैँको शुभकामना दिएका थिए। त्यसैगरी अध्यक्ष ढकालले पनि सञ्चालक समिति र कर्मचारीलाई टीका–जमरा लगाइदिँदै शुभकामना आदानप्रदान गरेका थिए।
दसैँको शुभकामना आदानप्रदानसँगै आयोजित नियुक्तिपत्र वितरण कार्यक्रमले सहकारीको संस्थागत एकता र कृषि क्षेत्रको विकासमा सहकार्यको आवश्यकतालाई उजागर गरेको छ। कामधेनु सहकारीले दुग्ध उत्पादन, पशुपालन तथा किसानको हितका क्षेत्रमा गर्दै आएका गतिविधिलाई थप प्रभावकारी बनाउँदै लैजाने अपेक्षा गरिएको छ।
