ब्राजिललाई मोरक्कोले रोक्यो, विश्वकप २०२६ को पहिलो खेल १–१ गोलको बराबरीमा सकियो
काठमाडौँ । फिफा विश्वकप २०२६ अन्तर्गत समूह ‘सी’ को बहुप्रतिक्षित खेलमा पाँच पटकको विश्व च्याम्पियन ब्राजिलले विजयी सुरुआत गर्न सकेन। अफ्रिकन शक्ति मोरक्कोले उत्कृष्ट प्रदर्शन गर्दै ब्राजिललाई १–१ गोलको बराबरीमा रोक्दै महत्वपूर्ण अंक हात पारेको छ।
न्यू जर्सीस्थित मेटलाइफ रंगशालामा सम्पन्न खेलमा मोरक्कोले पहिलो अग्रता बनाएको थियो। खेलको २१औँ मिनेटमा इस्माइल साइबारीले आकर्षक गोल गर्दै ‘एट्लास लायन्स’लाई अगाडि बढाएका थिए।
दबाबमा परेको ब्राजिलले ३२औँ मिनेटमा खेलमा पुनरागमन गर्यो। ब्रुनो गुइमाराएसको उत्कृष्ट पासमा भिनिसियस जुनियरले गोल गर्दै खेल १–१ को बराबरीमा ल्याए। त्यसपछि दुवै टोलीले आक्रामक खेल प्रस्तुत गरे पनि दोस्रो हाफमा कुनै गोल निस्कन सकेन र दुवैले अंक बाँड्न बाध्य भए।
पछिल्लो विश्वकपमा सेमिफाइनलसम्म पुगेर इतिहास रचेको मोरक्कोले फेरि एकपटक आफ्नो क्षमता प्रमाणित गरेको छ। यता, २४ वर्षपछि विश्वकप उपाधि फर्काउने लक्ष्यसहित मैदान उत्रिएको ब्राजिलले पहिलो खेलबाट अपेक्षित तीन अंक भने जोड्न सकेन।
विश्वकप इतिहासकै सबैभन्दा सफल टोली ब्राजिलले पाँच पटक उपाधि जितेको छ भने मोरक्को यसपटक पनि प्रतियोगिताको बलियो ‘डार्क हर्स’का रूपमा हेरिएको छ। इटालियन प्रशिक्षक कार्लो एन्सेलोटीको नेतृत्वमा रहेको ब्राजिल आगामी खेलमा पहिलो जित निकाल्ने लक्ष्यमा हुनेछ।
