निर्माण सामग्रीको मूल्यवृद्धिले सुदूरपश्चिमका सडक योजना ठप्प, पुँजीगत खर्चमा असर
सडक डिभिजन कार्यालय महेन्द्रनगरका सूचना अधिकारी इन्जिनियर हरिसप्रसाद जोशीका अनुसार आर्थिक वर्ष २०८२/८३ मा मुसेपानी खोला पुल र दोदा–देखतभुली पुल निर्माण सम्पन्न भई हस्तान्तरण भए पनि सडक कालोपत्रसँग सम्बन्धित करिब ७० प्रतिशत आयोजना ठप्प अवस्थामा पुगेका छन्। विशेषगरी अलकत्रा (विटुमिन) लगायत आवश्यक निर्माण सामग्रीको अभाव र मूल्यवृद्धिले काम अगाडि बढाउन कठिन भएको उनले बताए।
अत्तरिया–सहजपुर सडकखण्डको ३१.०६ किलोमिटर आवधिक मर्मत कार्य पूर्ण रूपमा रोकिएको छ। त्यस्तै, वैकल्पिक सहायक राजमार्ग विकास कार्यक्रमअन्तर्गत कैलाली र कञ्चनपुरका नौ वटा सडक योजनामा कालोपत्र निर्माण बन्द भएको छ। गड्डाचौकी–चिसापानी सडकखण्डमा भने नियमित मर्मत तथा स्तरोन्नति कार्य सीमित रूपमा सञ्चालन भइरहेको छ।
प्रभावित आयोजनामा चाँदनी–भीमदत्त–ब्रह्मदेव–पञ्चेश्वर–झुलाघाट सडक, झिलमिला–भुडा–बेलौरी भन्सार हुँदै आनन्द बजारसम्मको बोर्डर करिडोर, बेलौरी–कालागौडी–सिक्लपट्टी, बिचुवा–राजघाट, वनकट्टा–फूलबारी, हर्दही–बबपुर–चमकलपुर, जुगेडा, डुडेझारी हाइड्रोपावर सडक तथा चौमाला–गर्भादरबार–रिठेखोला–सिपिनगर रणनीतिक सडकलगायत योजना रहेका छन्।
यस्तै, राष्ट्रिय राजमार्गअन्तर्गत चाँदनी–भीमदत्त–ब्रह्मदेव–पञ्चेश्वर–झुलाघाट (एनएच–६७), चिसापानी–गड्डाचौकी (एनएच–०१) तथा अत्तरिया–सहजपुर–फल्टुँडे (एनएच–६६) सडकखण्डका निर्माण कार्यसमेत प्रभावित भएका छन्।
ठेक्का सम्झौतामा मूल्य समायोजनको व्यवस्था नहुँदा निर्माण व्यवसायीलाई थप लागत उपलब्ध गराउन कानुनी जटिलता रहेको कार्यालयले जनाएको छ। विटुमिन, डिजेल, पेट्रोललगायत सामग्रीको मूल्य वृद्धि तथा आपूर्ति समस्याले विशेषगरी कालोपत्रका काममा ठूलो असर परेको छ।
आर्थिक वर्ष समाप्त हुन थोरै समय बाँकी रहँदा विकास बजेट खर्चको गति न्यून छ। योजनाहरू समयमै पूरा नहुँदा पुँजीगत खर्च लक्ष्य हासिल हुन नसक्ने र त्यसको प्रत्यक्ष असर स्थानीय विकास तथा अर्थतन्त्रमा पर्ने सूचना अधिकारी जोशीले बताए।
