नेपाल–रोमानिया सहकार्य विस्तारमा ठूलो सम्भावना : सांसद गणेश पराजुली
काठमाडौं । राष्ट्रिय स्वतन्त्र पार्टीका गणेश पराजुलीले नेपाल र रोमानिया बीच व्यापार, लगानी, पर्यटन तथा श्रम सहकार्य विस्तारको ठूलो सम्भावना रहेको बताएका छन्। सोमबार काठमाडौंमा आयोजित नेपाल–रोमानिया व्यापार मञ्चको उद्घाटन समारोह तथा अन्तरक्रिया कार्यक्रममा बोल्दै उनले हाल दुई देशबीचको व्यापारिक परिमाण सानो भए पनि आगामी दिनमा सहकार्यका धेरै क्षेत्र खुला रहेको उल्लेख गरे।
उनले, नेपालले उच्च गुणस्तरका गार्मेन्ट, हस्तकला, जडीबुटी, कृषि उत्पादन तथा सूचना प्रविधि सेवा उपलब्ध गराउन सक्ने बताउँदै रोमानियालाई युरोपेली संघको प्रवेशद्वारका रूपमा व्याख्या गरे। उनका अनुसार यसले बजार पहुँच, प्रविधि हस्तान्तरण तथा औद्योगिक सहकार्यका लागि महत्वपूर्ण अवसर सिर्जना गर्न सक्छ। सांसद पराजुलीले नेपालमा पूर्वाधार, जलविद्युत, पर्यटन, सूचना प्रविधि र उत्पादन क्षेत्रहरूमा रोमानियाली लगानीलाई स्वागत गरिने बताए। संयुक्त लगानीमार्फत दुवै देशमा रोजगारी सिर्जना, उत्पादकत्व वृद्धि र नवीनतालाई प्रोत्साहन गर्न सकिने उनको भनाइ थियो।
उनले नेपाली कामदारहरू मेहनती, इमानदार र अनुकूलन क्षमतायुक्त रहेको उल्लेख गर्दै सुरक्षित तथा व्यवस्थित श्रम आप्रवासन विस्तारले दुवै देशलाई लाभ पुग्ने बताए। यसबाट रोमानियाको श्रम माग पूरा हुनुका साथै नेपालको रेमिट्यान्स, सीप विकास र आर्थिक सुदृढीकरणमा योगदान पुग्ने उनले बताए। पराजुलीले पर्यटन तथा सांस्कृतिक आदानप्रदानले पनि नेपाल र रोमानियाबीचको सम्बन्धलाई थप मजबुत बनाउने धारणा राखे। हिमालय र समृद्ध सांस्कृतिक सम्पदाले भरिएको नेपाल रोमानियाली पर्यटकका लागि आकर्षक गन्तव्य बन्न सक्ने तथा नेपालीहरूले पनि रोमानियाको इतिहास र युरोपेली सांस्कृतिक विविधताबाट लाभ लिन सक्ने उनले उल्लेख गरे।
उनले नेपाल–रोमानिया व्यापार मञ्चले संवादलाई व्यवहारिक साझेदारीमा रूपान्तरण गर्ने विश्वास व्यक्त गर्दै निरन्तर सहकार्यले दुई देशबीचको सम्बन्ध अझ प्रगाढ हुने बताए।
