वडाको नेतृत्वदेखि प्रदेश सभापतिको उम्मेदवारीसम्म : रामकुमार विश्वास खवासको चार दशक लामो राजनीतिक यात्रा
एलएन गच्छदार / सुन्दरहरैंचा ।
राजनीति पदका लागि मात्र होइन, जनताको सुख–दुःखमा साथ दिने र समाजका लागि केही गर्ने प्रतिबद्धताको यात्रा हो भन्ने मान्यता बोकेर अघि बढेका राम विश्वास खवास अहिले नेपाली कांग्रेस प्रदेश सभा क्षेत्र ३(ख), मोरङको सभापति पदका उम्मेदवार बनेका छन्। स्थानीय तहको वडा नेतृत्वदेखि पार्टी संगठन र लोकतान्त्रिक आन्दोलनसम्मको लामो अनुभव बोकेका खवास हाल सुन्दरहरैंचा नगरपालिका–१ का निर्वाचित वडा अध्यक्षका रूपमा कार्यरत छन्।
चार दशकभन्दा लामो राजनीतिक तथा सामाजिक यात्रामा खवासले पार्टी संगठन, जनप्रतिनिधि र सामाजिक नेतृत्वका विभिन्न जिम्मेवारी सम्हालेका छन्। २०४७ सालमा नवजागृति क्लब, पचामको अध्यक्ष बनेर सामाजिक नेतृत्वमा प्रवेश गरेका उनी त्यसको एक वर्षपछि २०४८ सालमा नेपाली कांग्रेसको नवौँ अधिवेशनबाट वडा सभापति बने।
त्यसपछि उनको राजनीतिक यात्रा स्थानीय जनप्रतिनिधिको जिम्मेवारीतर्फ अघि बढ्यो। २०४९ र २०५४ सालमा तत्कालीन हरैंचा गाविसको वडा अध्यक्षमा निर्वाचित हुँदै उनले जनताको प्रत्यक्ष प्रतिनिधिका रूपमा काम गरे। लामो समयपछि अहिले पनि जनप्रतिनिधिकै भूमिकामा फर्किएर सुन्दरहरैंचा–१ को वडा अध्यक्षका रूपमा काम गरिरहेका छन्।
स्थानीय नेतृत्वको अनुभवसँगै सामाजिक क्षेत्रमा पनि उनको सक्रियता रह्यो। २०५७ सालमा जुडी–९ पैनीको अध्यक्ष बनेका खवासले समुदायसँग प्रत्यक्ष जोडिएका सामाजिक गतिविधिमा नेतृत्वदायी भूमिका निर्वाह गरे।
आन्दोलनदेखि संगठनसम्म
खवासको राजनीतिक यात्रा स्थानीय विकास र संगठनमा मात्र सीमित छैन। २०५९ सालमा तत्कालीन राजा ज्ञानेन्द्रको प्रत्यक्ष शासनविरुद्ध काठमाडौंमा भएको लोकतान्त्रिक आन्दोलनमा करिब एक महिना सहभागी भएको उनको राजनीतिक पृष्ठभूमि छ।
नेपाली कांग्रेसको संगठन निर्माणमा निरन्तर सक्रिय रहेका उनी ११औँ र १२औँ अधिवेशनबाट तीनपटक क्षेत्रीय प्रतिनिधि बने। पछिल्लो २०८३ सालको १५औँ अधिवेशनमा सुन्दरहरैंचा–१ बाट क्षेत्रीय प्रतिनिधिमा सर्वसम्मत निर्वाचित भएका छन्।
यसरी हेर्दा खवासको राजनीतिक यात्रा वडा सभापतिबाट सुरु भएर वडा अध्यक्ष, क्षेत्रीय प्रतिनिधि हुँदै अहिले प्रदेश सभा क्षेत्रको नेतृत्वको दाबीसम्म आइपुगेको छ।
‘जनताको बीचमै रहने नेतृत्व’
सुन्दरहरैंचा–१ मा वडा अध्यक्षका रूपमा काम गरिरहेका खवासलाई स्थानीय तहमा विकास निर्माणप्रति चासो राख्ने र नागरिकका सुख–दुःखमा साथ दिने जनप्रतिनिधिका रूपमा उनका समर्थकहरूले प्रस्तुत गर्दै आएका छन्। वडा कार्यालयको जिम्मेवारीसँगै स्थानीय नागरिकसँग प्रत्यक्ष संवाद र सामाजिक गतिविधिमा सहभागितालाई उनले आफ्नो कार्यशैलीको महत्वपूर्ण हिस्सा बनाउँदै आएको बताइन्छ।
उनको राजनीतिक यात्रामा देखिने अर्को पक्ष हो—पद परिवर्तन भए पनि जनतासँगको सम्बन्धलाई निरन्तरता दिने प्रयास। चार दशकअघि वडा संगठनबाट सुरु भएको यात्रा अहिले फेरि वडा नेतृत्वमै रहँदै प्रदेशस्तरीय पार्टी नेतृत्वको दाबीसम्म पुगेको छ।
अनुभवलाई प्रदेश नेतृत्वसँग जोड्ने प्रयास
प्रदेश सभा क्षेत्र ३(ख), मोरङको सभापति पदमा उम्मेदवारीसँगै खवासले आफ्नो स्थानीय तहको अनुभव, पार्टी संगठनमा बिताएको लामो समय र सामाजिक क्षेत्रको सक्रियतालाई क्षेत्रीय नेतृत्वसँग जोड्ने प्रयास गरेका छन्।
उनको उम्मेदवारीलाई उनका समर्थकहरूले लामो राजनीतिक अनुभव र स्थानीय तहमा काम गरेको प्रत्यक्ष अनुभवलाई पार्टी संगठनमा उपयोग गर्ने अवसरका रूपमा व्याख्या गरेका छन्। आगामी नेतृत्व चयनले भने कांग्रेस प्रदेश सभा क्षेत्र ३(ख)को संगठनात्मक दिशाबारे थप बहस अघि बढाउने देखिन्छ।
वडा सभापतिबाट सुरु भएको यात्रा, दुईपटकको गाविस वडा अध्यक्षको जिम्मेवारी, लोकतान्त्रिक आन्दोलनको सहभागिता, पटक–पटकको क्षेत्रीय प्रतिनिधित्व र अहिले निर्वाचित वडा अध्यक्षको जिम्मेवारी—रामकुमार विश्वास खवासको राजनीतिक यात्रा स्थानीय नेतृत्वमा निरन्तरता र संगठनमा लामो सक्रियताको उदाहरणका रूपमा प्रस्तुत भएको छ।
अब उनको दाबी प्रदेश सभा क्षेत्र ३(ख)को नेतृत्वसम्म पुग्ने प्रयासमा केन्द्रित छ।
