नरसिंह मेमोरियल सेकेण्डरी इङ्ग्लिस स्कुलमा भावनात्मक क्षण: एसइई दिएका कक्षा १० का विद्यार्थी बिदाइदेखि हजुरबुवा–हजुरआमा सम्मानसम्म

एलएन गच्छदार / सुन्दरहरैंचा

मोरङको सुन्दरहरैंचा नगरपालिका वडा–१ स्थित नरसिंह मेमोरियल इङ्ग्लिस स्कुलमा आयोजित ३४औं अभिभावक दिवस तथा पुरस्कार वितरण कार्यक्रम अत्यन्तै भावनात्मक, प्रेरणादायी र स्मरणीय बनेको छ। विद्यालय प्राङ्गणमा गुञ्जिएको हाँसो र आँसु मिसिएको त्यो दिन केवल औपचारिक कार्यक्रम नभई पुस्ताबीचको माया, सम्बन्ध र संस्कारको गहिरो अनुभूति बनेर बसेको देखिन्थ्यो।

कार्यक्रमको सबैभन्दा मार्मिक क्षण एसईई परीक्षा दिएका कक्षा १० का विद्यार्थीहरूको बिदाइ रह्यो। वर्षौँसम्म एउटै छानामुनि सिकेका, खेलेका र हुर्किएका विद्यार्थीहरू विद्यालय छोड्ने क्षणमा शिक्षक, अभिभावक र स्वयं विद्यार्थीहरू भावुक बने। कसैको आँखामा आँसु रोकिएन, कसैको मन सम्झनाले भारी बन्यो। “अब फेरि यही गल्लीमा विद्यार्थीको हाँसो गुञ्जिँदैन” भन्ने अनुभूति गर्दै शिक्षकहरूले विद्यार्थीलाई अँगालो हालेर विदा गर्दा वातावरण अत्यन्तै स्तब्ध र हृदयविदारक बनेको थियो। त्यो क्षण केवल बिदाइ होइन, जीवनको नयाँ यात्रातर्फको भावनात्मक मोड थियो।

त्यसैगरी, कार्यक्रममा अर्को अत्यन्तै मर्मस्पर्शी दृश्य विद्यालयमा अध्ययनरत विद्यार्थीका हजुरबुवा–हजुरआमा तथा ज्येष्ठ नागरिकहरूलाई गरिएको सम्मान रह्यो। दोसल्ला ओढाइ, नगद, छाता र सम्मानपत्र प्रदान गर्दा उनीहरूको अनुहारमा देखिएको गर्व र खुशी शब्दमा बयान गर्न कठिन थियो। आफ्ना नाति–नातिनाको प्रगति साक्षी बनेर सम्मानित हुन पाउँदा धेरै ज्येष्ठ नागरिकका आँखामा खुशीका आँसु झल्किएका थिए। यो दृश्यले विद्यालयले शिक्षा मात्र होइन, संस्कार, सम्मान र सामाजिक उत्तरदायित्व पनि समान रूपमा अघि बढाइरहेको स्पष्ट सन्देश दिएको थियो।

कार्यक्रममा शैक्षिक सत्रको नतिजा सार्वजनिक गर्दै उत्कृष्ट विद्यार्थीहरूलाई सम्मान तथा पुरस्कार वितरण गरिएको थियो। साथै “नरसिंह डान्स आइडल” पहिलो सिजनका उत्कृष्ट विद्यार्थीहरूलाई मेडल, प्रमाणपत्र तथा नगद पुरस्कार प्रदान गर्दा विद्यार्थीहरूको अनुहारमा आत्मविश्वास र नयाँ उर्जा झल्किएको थियो।

कार्यक्रमको उद्घाटन वडा अध्यक्ष राम विश्वास खवास ले गर्नुभएको थियो। उहाँले विद्यालयको शैक्षिक गुणस्तर र सामाजिक भूमिकाको प्रशंसा गर्दै यस्ता कार्यक्रमले विद्यार्थीको सर्वाङ्गीण विकासमा महत्वपूर्ण योगदान दिने बताउनुभयो।

विद्यालय व्यवस्थापन समिति अध्यक्ष गोबिन्द कार्की ले विद्यालयलाई सफल बनाउने आधार अभिभावक, शिक्षक र विद्यार्थीबीचको सहकार्य भएको उल्लेख गर्दै भविष्यमा अझ गुणस्तरीय शिक्षा प्रदान गर्ने प्रतिबद्धता व्यक्त गर्नुभयो। त्यस्तै, प्याब्सन नगर अध्यक्ष दिपक क्षेत्री ले निजी विद्यालयहरूले राष्ट्र निर्माणमा खेलेको भूमिकालाई उजागर गर्दै यस्ता कार्यक्रमले विद्यार्थीलाई आत्मनिर्भर र सक्षम बनाउने धारणा राख्नुभयो।

कार्यक्रमभर विद्यार्थी, अभिभावक र शिक्षकहरूको बेग्ला–बेग्लै सांस्कृतिक प्रस्तुति अर्को आकर्षण बनेको थियो। विद्यार्थीहरूको नृत्य, गीत र नाट्य प्रस्तुतिले माहोललाई उत्साहपूर्ण बनाउँदा अभिभावक र शिक्षकहरूको प्रस्तुतिले कार्यक्रमलाई अझ आत्मीय, पारिवारिक र भावनात्मक बनाएको थियो।

कार्यक्रमको अन्त्यमा प्रिन्सिपल केशव सापकोटा ले धन्यवाद ज्ञापन गर्दै भावुक हुँदै भन्नुभयो, “विद्यार्थीहरू केवल किताब पढ्न मात्र होइन, जीवनका मूल्य सिक्न यहाँ आएका हुन्। आज उनीहरूलाई विदा गर्दा गर्वसँगै मन अत्यन्तै भारी भएको छ। जहाँ गए पनि यहाँ सिकेका अनुशासन, संस्कार र मेहनत कहिल्यै नबिर्सनुहोस्।” उहाँको उक्त भनाइले उपस्थित सबैलाई गहिरो रूपमा छोएको थियो।

समग्रमा, नरसिंह मेमोरियल  इङ्ग्लिस स्कुलको ३४औं अभिभावक दिवस केवल एक औपचारिक कार्यक्रम नभई आँसु, हाँसो, सम्मान र संस्कार मिसिएको जीवन्त भावनात्मक उत्सवका रूपमा स्मरणीय बनेको छ।