सफल सिद्धार्थ एकेडेमी : संस्कारयुक्त शिक्षासँगै प्रविधिमैत्री पठनपाठनको गन्तव्य
पाँच सयभन्दा बढी विद्यार्थीको भविष्य निर्माणमा ४१ सदस्यीय टिम, पढाइसँगै खेलकुद, सिर्जनशीलता र नेतृत्व विकासमा जोड
एलएन गच्छदार / सुन्दरहरैँचा ।
विद्यालय भनेको केवल पाठ्यपुस्तक पढाउने थलो मात्र होइन, बालबालिकाको ज्ञान, सीप, संस्कार, आत्मविश्वास र व्यक्तित्व निर्माण गर्ने आधार हो। यही अवधारणालाई आत्मसात् गर्दै मोरङको सुन्दरहरैँचा–५, बाँसबारी चोकबाट करिब ४ सय मिटर उत्तरतर्फ रहेको सफल सिद्धार्थ एकेडेमी गुणस्तरीय तथा संस्कारयुक्त शिक्षाको गन्तव्यका रूपमा आफ्नो पहिचान स्थापित गर्दै अघि बढिरहेको छ।
५ सयभन्दा बढी विद्यार्थीको भविष्यसँग जोडिएको विद्यालयमा ४१ जना शिक्षक तथा कर्मचारी कार्यरत छन्। दक्ष तथा समर्पित शिक्षक–कर्मचारीको टिममार्फत विद्यार्थीलाई समयअनुकूल शिक्षा प्रदान गर्दै आएको विद्यालयले पढाइसँगै व्यवहारिक ज्ञान, संस्कार, अनुशासन, सिर्जनशीलता र नेतृत्व विकासलाई प्राथमिकतामा राखेको छ।
प्रविधिमैत्री शिक्षण, समयअनुकूल सिकाइ
शिक्षण सिकाइमा प्रविधिको महत्व बढ्दै गएको वर्तमान समयमा सफल सिद्धार्थ एकेडेमीले पनि आधुनिक प्रविधिलाई शिक्षण पद्धतिको अभिन्न अंग बनाएको छ। विद्यालयमा कम्प्युटर साइन्स ल्याब, स्मार्ट बोर्डसहितका कक्षाकोठा तथा विद्यार्थीको सिकाइलाई प्रभावकारी बनाउने विभिन्न शैक्षिक पूर्वाधारको व्यवस्था गरिएको छ।
स्मार्ट प्रविधिको प्रयोगबाट विद्यार्थीलाई विषयवस्तु बुझ्न सहज बनाउने, खोज तथा अनुसन्धान गर्ने बानी विकास गर्ने र सिर्जनात्मक सोचलाई प्रोत्साहन गर्ने प्रयास विद्यालयले गर्दै आएको छ।
अभिभावकको विश्वास, विद्यालयको जिम्मेवारी
विद्यालयको सफलताको महत्वपूर्ण आधार अभिभावकले गरेको विश्वासलाई मानिएको छ। आफ्ना छोराछोरीको भविष्य निर्माणका लागि अभिभावकले विद्यालयप्रति गरेको भरोसालाई जिम्मेवारीका रूपमा लिँदै विद्यार्थीलाई शैक्षिक रूपमा अब्बल मात्र होइन, दक्ष, अनुशासित र सामाजिक रूपमा जिम्मेवार नागरिक बनाउने लक्ष्य विद्यालयले लिएको छ।
विद्यालयले विद्यार्थीको क्षमता केवल परीक्षाको अंकबाट मूल्याङ्कन गर्नेभन्दा पनि उनीहरूको रुचि, प्रतिभा, सिर्जनशीलता, व्यवहारिक क्षमता र नेतृत्व क्षमताको विकासमा जोड दिँदै आएको जनाएको छ।
पढाइसँगै खेलकुद र अतिरिक्त क्रियाकलाप
बालबालिकाको सर्वाङ्गीण विकासका लागि पढाइसँगै खेलकुद तथा अतिरिक्त क्रियाकलाप आवश्यक हुने मान्यताका साथ विद्यालयले विभिन्न गतिविधिलाई प्राथमिकता दिएको छ।
विशेषगरी मन्टेश्वरी तहका बालबालिकाका लागि खेल्दै सिक्ने वातावरण, खेलकुद तथा विभिन्न अतिरिक्त क्रियाकलापमार्फत उनीहरूको शारीरिक, मानसिक तथा सामाजिक विकासमा जोड दिइएको छ।
विद्यालयमा अध्ययनरत विद्यार्थीलाई किताबी ज्ञानमा मात्र सीमित नराखी उनीहरूको प्रतिभा पहिचान गरी विभिन्न गतिविधिमा सहभागी गराउने प्रयास हुँदै आएको विद्यालयको भनाइ छ। यसले सुनसरी–मोरङ क्षेत्रका विद्यार्थीलाई अध्ययनसँगै आफ्नो प्रतिभा प्रस्तुत गर्ने अवसरसमेत प्रदान गरेको छ।
विद्यार्थीमा ज्ञानसँगै नेतृत्वको संस्कार
सफल सिद्धार्थ एकेडेमीको अर्को महत्वपूर्ण पक्ष विद्यार्थीमा नेतृत्व क्षमताको विकास गर्नु हो। विद्यालयले बालबालिकालाई आफ्ना विचार राख्न, समूहमा काम गर्न, जिम्मेवारी लिन र सामाजिक गतिविधिमा सहभागी हुन प्रेरित गर्दै आएको छ।
विद्यालयका प्रधानाध्यापक राजन लम्सालका अनुसार विद्यार्थीलाई भविष्यमा सक्षम र जिम्मेवार नागरिक बनाउने उद्देश्यले शिक्षालाई व्यवहारिक र जीवनोपयोगी बनाउने प्रयास भइरहेको छ।
उनका अनुसार, “विद्यार्थीलाई केवल राम्रो अंक ल्याउने बनाउनु मात्र हाम्रो उद्देश्य होइन, उनीहरूमा ज्ञानसँगै दक्षता, आत्मविश्वास, अनुशासन, संस्कार र सामाजिक नेतृत्वको भावना विकास गराउनु हाम्रो प्राथमिकता हो।”
राष्ट्रिय बाल दिवसको अवसरमा अन्तरविद्यालय क्विज
विद्यार्थीको ज्ञान, सिर्जनशीलता तथा प्रतिस्पर्धात्मक क्षमता अभिवृद्धि गर्ने उद्देश्यले विद्यालयले राष्ट्रिय बाल दिवसको पूर्वसन्ध्यामा अन्तरविद्यालय आधारभूत तह क्विज प्रतियोगिता–२०८३ आयोजना गर्दैछ।
विद्यालयमा सञ्चालित सृजनशील बाल क्लबको आयोजनामा भदौ २७ गते बिहान १० बजे प्रतियोगिता सञ्चालन हुनेछ। कक्षा ८ सम्म अध्ययनरत विद्यार्थी सहभागी हुन पाउने प्रतियोगितामा प्रत्येक विद्यालयबाट चार जना विद्यार्थी सहभागी हुनुपर्नेछ, जसमा कम्तीमा एक जना छात्रा अनिवार्य गरिएको छ।
प्रतियोगितामा धर्म, खेलकुद, समसामयिक विषय, इतिहास, साहित्य, आईक्यू, भूगोल, विज्ञान तथा प्रविधि, श्रव्य, दृश्य र र्यापिड फायर गरी ११ वटा राउण्डमा प्रतिस्पर्धा गराइनेछ।
प्रतियोगितामा प्रथम हुने टोलीले नगद ८ हजार रुपैयाँसहित ट्रफी, मेडल र प्रमाणपत्र, द्वितीय हुनेले नगद ६ हजार रुपैयाँ तथा तृतीय हुनेले नगद ४ हजार रुपैयाँसहित ट्रफी, मेडल र प्रमाणपत्र प्राप्त गर्नेछन्।
विद्यालयका प्रधानाध्यापक लम्सालका अनुसार यस्ता प्रतियोगिताले विद्यार्थीलाई पाठ्यपुस्तकको ज्ञानमा मात्र सीमित नराखी समसामयिक विषय, व्यवहारिक ज्ञान, आत्मविश्वास र प्रतिस्पर्धात्मक क्षमताको विकास गर्न सहयोग पुर्याउँछ।
संस्कार, प्रविधि र गुणस्तरीय शिक्षाको संयोजन
आजको प्रतिस्पर्धात्मक समयमा विद्यालयको सफलता केवल भौतिक पूर्वाधार वा परीक्षाको नतिजाले मात्र निर्धारण हुँदैन। विद्यार्थीले विद्यालयबाट कस्तो संस्कार पाए, उनीहरूमा कस्तो आत्मविश्वास विकास भयो र भविष्यका चुनौती सामना गर्न कति सक्षम भए भन्ने कुरा पनि उत्तिकै महत्वपूर्ण हुन्छ।
यही पक्षलाई केन्द्रमा राख्दै सफल सिद्धार्थ एकेडेमीले गुणस्तरीय शिक्षा, दक्ष शिक्षक–कर्मचारी, आधुनिक प्रविधि, खेलकुद, अतिरिक्त क्रियाकलाप र संस्कारयुक्त बालमैत्री वातावरणलाई एकै ठाउँमा जोड्ने प्रयास गरेको छ।
विद्यालयको मुख्य उद्देश्य विद्यार्थीलाई उत्कृष्ट शैक्षिक ज्ञानसँगै असल संस्कार, आत्मविश्वास, व्यवहारिक सीप, सिर्जनशील सोच र नेतृत्व क्षमता प्रदान गर्दै भविष्यमा जिम्मेवार तथा सक्षम नागरिकका रूपमा तयार गर्नु रहेको विद्यालयले जनाएको छ।
यसरी हेर्दा सफल सिद्धार्थ एकेडेमी केवल पढाइ हुने ठाउँभन्दा पनि विद्यार्थीको भविष्य, प्रतिभा र व्यक्तित्व निर्माण गर्ने शैक्षिक थलोका रूपमा आफ्नो यात्रालाई अघि बढाइरहेको देखिन्छ।
