झापा र पाँचथरमा छुट्टाछुट्टै दुर्घटना : बालकसहित तीन जनाको मृत्यु
झापाको गौरादह नगरपालिका–७ स्थित भित्री पक्की सडकमा सजग एकता बोर्डिङ स्कुलको बसले किच्दा यूकेजीमा अध्ययनरत चार वर्षीय आरोग्य चिमरियाको मृत्यु भएको हो । बुधबार साँझ करिब ५ बजे लाठीचौरबाट फगेटीतर्फ जाँदै गरेको को १ ख ६९४० नम्बरको बसबाट घर नजिकै ओर्लने क्रममा बालक बसको चपेटामा परेका थिए । दुर्घटनामा उनको घटनास्थलमै मृत्यु भएको प्रहरीले जनाएको छ ।
प्रहरीका अनुसार बालकलाई ओरालेर बस अगाडि बढाउने क्रममा दुर्घटना भएको हो । बस चालक गौरादह–७ का ५७ वर्षीय लालबहादुर बस्नेतलाई इलाका प्रहरी कार्यालय गौरीगञ्जले नियन्त्रणमा लिएको छ । बस पनि प्रहरी नियन्त्रणमा रहेको छ ।
त्यस्तै, पाँचथरको फिदिम नगरपालिका–८ मान्द्रे भिरस्थित पौवासार्ताप–तामाखे भित्री कच्ची सडकमा मोटरसाइकल दुर्घटना हुँदा चालकको मृत्यु भएको छ । बुधबार राति करिब ८ः०५ बजे मङसिरेबाट घुमाउनेटारतर्फ जाँदै गरेको नम्बर नखुलेको रोयल इन्फिल्ड बुलेट मोटरसाइकल अनियन्त्रित भई करिब ७ सय मिटर तल खसेको थियो ।
दुर्घटनामा मोटरसाइकल चालक फिदिम–८ का ३३ वर्षीय दिपेन गुरुङको घटनास्थलमै मृत्यु भएको प्रहरीले जनाएको छ । चिप्लो सडकका कारण दुर्घटना भएको प्रारम्भिक अनुमान गरिएको छ । अप्ठ्यारो भिरमा मोटरसाइकल खसेकाले तत्काल निकाल्न कठिन भएको प्रहरीले जनाएको छ ।
उता, झापाको बाह्रदशी गाउँपालिका–३ मा ट्र्याक्टरबाट बालुवा अनलोड गर्ने क्रममा घाइते भएका ३३ वर्षीय शिवलाल हेमरमको उपचारका क्रममा मृत्यु भएको छ । गत जेठ १० गते मे १ त ६२६८ नम्बरको ट्र्याक्टरमा बालुवा झार्ने क्रममा लडेर गम्भीर घाइते भएका उनको विभिन्न अस्पतालमा उपचारपछि विराटनगरस्थित नोबेल अस्पतालमा शल्यक्रिया गरिएको थियो । आईसीयूमा उपचाररत अवस्थामा बिहीबार बिहान उनको मृत्यु भएको प्रहरीले जनाएको छ । तीनै घटनाबारे प्रहरीले थप अनुसन्धान गरिरहेको छ ।
