सुन्दरहरैंचाबाट वाम एकताको बलियो संदेश: विस्तारित बैठकले अभियानलाई द्रुत गति दिने निर्णय
सुन्दरहरैंचा। नेपाल कम्युनिस्ट पार्टी (एकीकृत समाजवादी) सुन्दरहरैंचा नगर समितिको विस्तारित बैठक कार्तिक २२ गते शनिबार सम्पन्न भएको छ। बैठकले कार्तिक १९ गते मुलुकका १० वटा वामपन्थी पार्टीहरूले संयुक्त रूपमा गठन गरेको ‘नेपाल कम्युनिस्ट पार्टी’ निर्माण प्रक्रियालाई ऐतिहासिक र सकारात्मक कदमका रूपमा स्वागत गर्दै वाम एकता अभियानमा सक्रिय सहभागिता जनाउने निर्णय गरेको छ।
बैठकमा सहभागी वक्ताहरूले श्रमिक, किसान, युवा, विद्यार्थी, महिला तथा न्यूनआय वर्गको अधिकार संरक्षार्थ वामपन्थी शक्तिहरू बीचको एकता अपरिहार्य भएको धारणा राखे। उनीहरूका अनुसार देशमा बढ्दो आर्थिक असमानता, बेरोजगारी, श्रम शोषण र राजनीतिक अस्थिरताको समाधान संगठित वाम शिविरको सशक्त नेतृत्वमार्फत मात्र सम्भव छ।
सो अवसरमा एकीकृत समाजवादीका नेता लक्ष्मी कुमार श्रेष्ठले भने:
“एकता केवल संगठनको विस्तार होइन, विचारको दृढता र जनताको भरोसा पुनर्स्थापना गर्ने ऐतिहासिक दायित्व पनि हो। आज जनताले दिशा, विकल्प र भरोसा खोजिरहेका छन्। वाम शक्तिहरू एकताबद्ध भएर हिँड्न सकेनन् भने श्रमजीवी वर्गको भविष्य अन्योलमा पर्न सक्छ। हामी सुन्दरहरैंचाबाटै वाम एकतालाई जनस्तरमा बलियो रूपमा अघि बढाउने छौं।”
उनका अनुसार पार्टी अब जनजीविकासँग जोडिएका एजेन्डामा स्थानीय स्तरमै अभियान, छलफल र संगठन सुदृढीकरणलाई तीव्रता दिनेछ।
बैठकले पार्टीका जनसंगठन, वर्गीय समिति र टोलस्तरीय संरचना सुदृढीकरण, सदस्यता नवीकरण, स्थानीय अभियान विस्तार तथा जनगुनासो सम्बोधनमा केन्द्रित रहने रणनीति पनि तय गरेको छ।
