“नारायण गोपाल स्मृति–साँझ : सिद्धार्थ स्कुलका नानीहरूको मधुर श्रद्धाञ्जली”
एलएन गच्छदार / सुन्दरहरैंचा
सुन्दरहरैंचा–१० मा रहेको सिद्धार्थ सेकेन्डरी स्कुलमा शुक्रबार नेपाली संगीतका ‘स्वरसम्राट’ नारायण गोपालको ३५औँ स्मृति दिवस विशेष कार्यक्रमका साथ मनाइएको छ। विद्यालयका नानी–बाबुहरूले स्वरसम्राटका अमर गीतहरू आफ्नै मधुर बाल–स्वरमा प्रस्तुत गर्दै स्मृति समारोहलाई हृदयस्पर्शी बनाएका थिए।
कार्यक्रमको आरम्भसँगै विद्यालयको सभाहल ‘सुर–मन्दिर’जस्तै परिवेशमा परिणत भएको अनुभूति उपस्थित शिक्षक, अभिभावक, संगीतकर्मी तथा साहित्य–स्रष्टाले गरेका थिए। विद्यार्थीहरूले “यति धेरै माया”, “एउटा मान्छेको मायाले”, “के भनूँ मैंली”, “यसपटक तिम्रै”देखि “ए मेरो प्राण”सम्मका चर्चित गीतहरू प्रस्तुत गर्दा सभाहलभरि भावनाको मिठास र स्मृतिको ओजिलो तान फैलिएको थियो।
बालकण्ठमा पुनर्जीवित ती गीतहरूले नारायण गोपालको कलालाई नयाँ पुस्ताले कसरी आत्मसात् गर्दैछ भनेर स्पष्ट देखाएको अभिभावकहरूले बताए।
कार्यक्रमलाई सम्बोधन गर्दै विद्यालयका संस्थापक प्रिन्सिपल अर्जुन बस्नेतले स्वरसम्राटको योगदान अपूरणीय रहेको भन्दै भने, “हाम्रा बालबालिकाले प्रस्तुत गरेका गीत केवल प्रस्तुति होइनन्—तिनीहरू नारायण गोपालप्रतिको सम्मान र नेपाली सांस्कृतिक चेतनाप्रतिको समर्पणका अभिव्यक्ति हुन्।” उनका अनुसार यस्ता कार्यक्रमले नयाँ पुस्तामा सांस्कृतिक मूल्य, संगीतप्रेम र कलाप्रतिको सम्मान थप गहिरो बनाउँदै लैजान मद्दत गर्दछ।
केही विद्यार्थीले स्वरमार्फत भावना पोख्दा, केहीले नृत्यमार्फत गीतको आत्मा व्यक्त गरे। हात–मुद्रादेखि भाव–भंगिमा र तालसम्म, प्रत्येक प्रस्तुतिले दर्शकलाई भावविभोर बनायो। स्रष्टा र संगीतप्रेमीहरूका अनुसार, नानी–बाबुहरूको प्रस्तुति नारायण गोपालका गीतको सांगीतिक गहिराइ र काव्यिक आत्मालाई सुन्दर रूपमा पुनःजिउँदो बनाउने प्रयास थियो।
कार्यक्रमको अन्त्यतिर प्रस्तुत गरिएको सामूहिक गीत “भुली दिने लाई समझिदिनेलाई …” ले सभाहललाई एकछिन मौन बनायो—भावनाले भरिपूर्ण। उपस्थित सबैको अभिव्यक्ति एउटै थियो-“नारायण गोपाल केवल नाम होइनन्; उनी स्वर, भावना र समयभन्दा टाढा नहुने सांगीतिक धरोहर हुन्।”
सिद्धार्थ स्कुलले आगामी दिनमा पनि कला, साहित्य र संगीतका सिर्जनात्मक कार्यक्रमलाई निरन्तरता दिँदै जाने जनाएको छ। आजको स्मृति समारोहले नानीहरूको स्वरमा स्वरसम्राटलाई पुनःबिउझाउँदै नेपाली संगीतप्रतिको सम्मानलाई अझ गहिरो बनाएको छ।
