सुन्दरहरैंचा महिला मञ्चको तेस्रो साधारण सभा सम्पन्न, अध्यक्षमा बिमला अधिकारी ढकाल
…एलएन गच्छदार / सुन्दरहरैंचा
मोरङको सुन्दरहरैंचा महिला मञ्चको तेस्रो वार्षिक साधारण सभा तथा दोस्रो अधिवेशन शनिबार सम्पन्न भएको छ। अधिवेशनले बिमला अधिकारी ढकाललाई अध्यक्षमा सर्वसम्मत चयन गरेको छ।
सुन्दरहरैंचा नगरपालिका–७ स्थित पोखरेल वंश प्रतिष्ठानमा सम्पन्न कार्यक्रममा निवर्तमान नगर प्रमुख शिव प्रसाद ढकाल प्रमुख अतिथि रहनु भएको थियो।
महिला सशक्तीकरणमा जोड
सो अवसरमा सामाजिक अभियन्ता नेत्र चौलागाईंले कार्यक्रमलाई सम्बोधन गर्दै महिला सशक्तीकरणको महत्त्व बारे प्रकाश पार्नुभयो। उहाँले महिलाहरूले आर्थिक, सामाजिक तथा राजनीतिक क्षेत्रमा समान अवसर पाउनुपर्ने बताउँदै, महिला मञ्चजस्ता संस्थाहरूले नेतृत्व विकासमा ठोस पहल गर्नुपर्ने उल्लेख गर्नुभयो।
निवर्तमान नगर प्रमुख शिव प्रसाद ढकालले आफ्नो सम्बोधनमा महिला नेतृत्व विकास र सामाजिक परिवर्तनका लागि यस्ता संस्थाहरूले महत्वपूर्ण योगदान पुर्याइरहेको बताउनुभयो। साथै, उहाँले नगरपालिकाले महिला सशक्तीकरणका कार्यक्रमहरूलाई निरन्तर समर्थन गर्ने प्रतिबद्धता जनाउनुभयो।
उत्साहजनक सहभागिता
कार्यक्रममा नगरका विभिन्न सामाजिक संघसंस्थाका प्रतिनिधिहरू, स्थानीय अगुवा तथा महिला सदस्यहरूको उत्साहजनक उपस्थिति रहेको थियो। पुनः अध्यक्षमा चयन भएपछि बिमला अधिकारी ढकालले महिला हकहित, शिक्षा, स्वास्थ्य र स्वरोजगार प्रवर्द्धनमा मञ्चले थप सक्रिय भूमिका निर्वाह गर्ने बताउनुभयो।
