उदयपुरकाे ताप्ली पोखरी क्षेत्रमा आन्तरिक पर्यटकहरूकाे घुइचाे

उदयपुर । उदयपुरको ताप्ली गाउँपालिकाको ताप्ली पोखरीमा आन्तरिक पर्यटकको संख्या बढ्न थालेको छ । मौसम सुधार भएसँगै कात्तिकको पहिलो हप्तादेखि आन्तरिक पर्यटकको संख्यामा बढ्न थालेको ताप्ली–५ का विष्णुबहादुर तामाङले बताए ।

उनकाअनुसार अहिले दैनिक सयौँको संख्यामा पर्यटकहरु पोखरी भ्रमण तथा पञ्चकन्या मन्दिरको दर्शन गर्न आउने गरेका छन् । यो जिल्लाको रौता पोखरीपछिको दोस्रो महत्वपूर्ण धार्मिक तथा पर्यटकीय गन्तव्य हो । पछिल्लो समय यस क्षेत्रमा बनभोजका लागि पनि समूहहरु आउन थालेको स्थानीय कृष्ण परियारको भनाइ छ ।

किंवदन्तीअनुसार चारसय सय वर्षअघि पोखरी क्षेत्रमा ठूलो जङ्गल र चौरीहरु थिए । एक दिन एकजना गोठालेले जङ्गलमा पाँच जना बालिकाहरु खेल्दै गरेको तर नजिक जाँदा अलप भएको घटना गाउँलेहरुलाई बताएका थिए । त्यसको भोलिपल्ट उक्त स्थानमा जाँदा पोखरी उत्पत्ति भएको स्थानीय डम्बर परियारको भनाइ छ ।

ताप्ली गाउँपालिकाका अध्यक्ष ढुङ्गराज विकका अनुुसार ताप्ली पोखरी क्षेत्र पाँच हेक्टर क्षेत्रफलमा फैलिएको छ । पोखरीको लम्बाइ तीन सय मिटर र चौडाइ ७० मिटर छ । पोखरी आसपासमा ठूला–ठूला रूख भए पनि पोखरीमा झरेका पात चराहरुले टिपेर सफा गर्ने गरेका छन् ।
ताप्ली पञ्चकन्या देवीको दर्शन गर्दा मनोकामना पुग्ने जनविश्वास छ । अहिले गाउँपालिकाको पहलमा ताप्लीमा मोटरबाटो पुगेपछि कटारी, गाईघाट, सप्तरी, सिरहा, धनुषा र सिन्धुली क्षेत्रबाट समेत दैनिक ठूलो संख्यामा पर्यटकहरु आउने गरेको गाउँपालिकाका पूर्वउपाध्यक्ष कमला राईले बताइन ।

गाउँपालिकाले आन्तरिक तथा बाह्य पर्यटन विकासका लागि ताप्ली क्षेत्रलाई गुरुयोजना नै बनाएर अघि बढाइएको गाउँपालिकाका अध्यक्ष विकले बताउनुभयो । यस क्षेत्रमा हाल विद्युत् विस्तार र भ्यू टावर निर्माण भइरहेको छ ।

यस क्षेत्रमा प्रत्येक वर्ष कात्तिकदेखि वैशाखसम्म ५० हजारभन्दा धेरै पर्यटकहरुको आगमन हुने हुनाले यस क्षेत्रको पर्यटन विकास र प्रवद्र्धनमा प्रदेश सरकार र संघीय सरकारसँग गुरुयोजनाका लागि बजेट माग गरिएको पूर्वप्रदेश सांसद कला घलेले बताइन् ।

जवाफ लेख्नुहोस्

तपाईँको इमेल ठेगाना प्रकाशित गरिने छैन। अनिवार्य फिल्डहरूमा * चिन्ह लगाइएको छ