स्थानीयमै स्वास्थ्य सेवा : सिद्धार्थ युवा क्लबको शिविरमा ५ सय बढीको स्वास्थ्य परीक्षण
सुन्दरहरैँचा (मोरङ) । स्थानीयस्तरमै स्वास्थ्य सेवाको पहुँच विस्तार गर्ने उद्देश्यले मोरङको सुन्दरहरैँचा–६ खर्साङ्गेनी चोकमा आयोजित एकदिने निःशुल्क स्वास्थ्य शिविरबाट करिब ५ सय स्थानीय लाभान्वित भएका छन्।
सिद्धार्थ युवा क्लबको आयोजना तथा कोशी आँखा अस्पताल प्रा.लि., इनरुवाको सहयोगमा सञ्चालन गरिएको शिविरमा स्थानीय बासिन्दाले आँखाको परीक्षण, रक्तचाप (प्रेसर) तथा मधुमेह (सुगर) परीक्षणलगायत स्वास्थ्यसम्बन्धी सेवा लिएका हुन्।
शिविरमा विशेषगरी आँखासम्बन्धी समस्या भएका नागरिकको उल्लेख्य सहभागिता रहेको थियो। स्वास्थ्यकर्मी तथा चिकित्सकले आँखाको परीक्षण गर्नुका साथै समस्या देखिएका बिरामीलाई आवश्यक परामर्श प्रदान गरेका थिए। परीक्षणका क्रममा चस्मा आवश्यक पर्ने सेवाग्राहीलाई सहुलियत दरमा चस्मा उपलब्ध गराउने व्यवस्था पनि गरिएको आयोजकले जनाएको छ।
अस्पतालसम्म पुगेर नियमित स्वास्थ्य परीक्षण गराउन आर्थिक तथा भौगोलिक कठिनाइ भोगिरहेका स्थानीयका लागि शिविर उपयोगी बनेको आयोजकको भनाइ छ। सामान्य स्वास्थ्य समस्या भए पनि आर्थिक अभाव वा अन्य कारणले अस्पताल पुग्न नसक्ने नागरिकलाई लक्षित गरी स्थानीयस्तरमै स्वास्थ्य सेवा उपलब्ध गराउने उद्देश्यले शिविर आयोजना गरिएको क्लबले जनाएको छ।
सिद्धार्थ युवा क्लबका अध्यक्ष सञ्जित राईका अनुसार शिविरका क्रममा आँखाको अप्रेसन आवश्यक पर्ने बिरामी पहिचान भएमा उनीहरूको उपचारलाई निरन्तरता दिइनेछ। अप्रेसन गर्नुपर्ने बिरामीका लागि निःशुल्क शल्यक्रियाको व्यवस्था गर्नुका साथै अस्पतालसम्म जाने–आउने खर्चसमेत क्लबले व्यवस्थापन गर्ने उनले बताए।
“शिविर एक दिनको स्वास्थ्य परीक्षणमा मात्र सीमित नरहोस् भन्ने हाम्रो उद्देश्य हो,” अध्यक्ष राईले भने, “अप्रेसन आवश्यक पर्ने बिरामी पहिचान भएमा उनीहरूको उपचारका लागि क्लबले आवश्यक सहजीकरण गर्नेछ।”
त्यस्तै, क्लबका सल्लाहकार डम्बर थापा मगरले आर्थिक रूपमा कमजोर तथा स्वास्थ्य सेवाको पहुँचमा समस्या भएका नागरिकलाई लक्षित गरेर शिविर सञ्चालन गरिएको बताए। स्थानीय नागरिकले आफ्नै क्षेत्रमा स्वास्थ्य परीक्षण तथा चिकित्सकीय परामर्श पाउने वातावरण बनाउन शिविर आयोजना गरिएको उनको भनाइ छ।
उनका अनुसार स्वास्थ्यसम्बन्धी समस्या देखिएपछि मात्र अस्पताल जाने प्रवृत्तिका कारण कतिपय नागरिकमा सामान्य समस्या पनि जटिल बन्ने गरेको पाइन्छ। त्यसैले समयमै स्वास्थ्य परीक्षण गराउने बानीको विकास गराउन यस्ता शिविरले सहयोग पुर्याउने उनले बताए।
शिविरमा आँखाको परीक्षणसँगै रक्तचाप र मधुमेह परीक्षणसमेत गरिएकाले ज्येष्ठ नागरिकदेखि युवा तथा अन्य उमेर समूहका स्थानीयले सेवा लिएका थिए। परीक्षणपछि आवश्यकताअनुसार स्वास्थ्यकर्मीले स्वास्थ्य अवस्था, उपचार तथा थप परीक्षणका विषयमा परामर्शसमेत दिएका थिए।
स्थानीय युवाको सक्रियतामा आयोजना गरिएको शिविरमा उल्लेख्य सहभागिता भएपछि आयोजकले स्वास्थ्य सेवाप्रतिको स्थानीय नागरिकको चासो र आवश्यकतालाई समेत उजागर गरेको जनाएको छ। विशेषगरी नियमित स्वास्थ्य परीक्षणका लागि अस्पताल जान नसक्ने तथा आर्थिक रूपमा कमजोर परिवारका नागरिकका लागि निःशुल्क शिविर प्रभावकारी माध्यम बनेको सहभागी स्थानीयको भनाइ छ।
स्थानीयस्तरमा सामाजिक तथा स्वास्थ्यसम्बन्धी गतिविधिमा युवाको सहभागिता बढाउँदै समुदायको आवश्यकताअनुसार कार्यक्रम सञ्चालन गर्ने उद्देश्य रहेको सिद्धार्थ युवा क्लबले जनाएको छ। क्लबले आगामी दिनमा पनि समुदायलाई प्रत्यक्ष लाभ पुग्ने सामाजिक तथा स्वास्थ्यसम्बन्धी कार्यक्रमलाई निरन्तरता दिने जनाएको छ।
करिब ५ सय स्थानीयले प्रत्यक्ष रूपमा स्वास्थ्य सेवा लिएपछि शिविरले समुदायमा स्वास्थ्य परीक्षणप्रतिको सचेतना बढाउनुका साथै आर्थिक तथा पहुँचका कारण उपचारबाट वञ्चित हुन सक्ने नागरिकलाई प्रारम्भिक स्वास्थ्य सेवासम्म जोड्ने काम गरेको आयोजकको निष्कर्ष छ।
