सुन्दरहरैँचामा तीनदिने अचार बनाउने तालिम सम्पन्न
एल.एन. गच्छदार
सुन्दरहरैँचा (मोरङ) – महिलाहरूलाई सीप, स्वरोजगार र उद्यमशीलतासँग जोड्ने उद्देश्यले सुन्दरहरैँचामा आयोजित तीनदिने अचार बनाउने तालिम सम्पन्न भएको छ।
नारी समाजको आयोजनामा तथा सुन्दरहरैँचा नगरपालिकाको सहयोगमा सञ्चालन गरिएको तालिममा स्थानीय महिलाहरूको उत्साहजनक सहभागिता रहेको थियो। तालिममा विभिन्न प्रकारका अचार उत्पादन, प्रशोधन, गुणस्तर व्यवस्थापन, प्याकेजिङ तथा बजारीकरणसम्बन्धी व्यावहारिक ज्ञान र सीप प्रदान गरिएको आयोजकले जनाएको छ।
तालिम समापन कार्यक्रममा बोल्दै सुन्दरहरैँचा नगरपालिकाका नगर प्रमुख केदारप्रसाद गुरागाईंले महिलाहरूलाई आर्थिक रूपमा आत्मनिर्भर बनाउन सीपमूलक तालिम आवश्यक रहेको बताए। उनले घरमै बसेर पनि आयआर्जन गर्न सकिने खालका सीपले महिलाको आर्थिक सशक्तीकरणमा महत्वपूर्ण योगदान पुर्याउने उल्लेख गरे।
“स्थानीय स्रोत र सम्भावनाको उपयोग गर्दै महिलाहरूलाई उत्पादन र उद्यमसँग जोड्न सकियो भने परिवारको आर्थिक अवस्था सुधार हुनुका साथै समग्र समाजको विकासमा समेत सकारात्मक प्रभाव पर्छ,” नगर प्रमुख गुरागाईंले भने, “नगरपालिकाले सीपमूलक तथा आयमूलक कार्यक्रमलाई आगामी दिनमा पनि प्राथमिकताका साथ अघि बढाउनेछ।”
तालिमका सहभागीहरूले सिकेको सीपलाई व्यवहारमा उतारेर घरेलु उद्योग तथा साना उद्यम सञ्चालन गर्ने प्रतिबद्धता व्यक्त गरेका थिए। उनीहरूले यस्ता कार्यक्रमले आत्मविश्वास बढाउनुका साथै आर्थिक अवसर सिर्जना गर्न मद्दत पुगेको बताएका छन्।
नारी समाजका पदाधिकारीहरूले महिलाको क्षमता विकास र आर्थिक सशक्तीकरणका लागि यस्ता कार्यक्रमलाई निरन्तरता दिइने जानकारी दिए। उनीहरूले तालिमबाट प्राप्त ज्ञानलाई उत्पादन र व्यवसायसँग जोड्न सहभागीहरूलाई आग्रह गरेका थिए।
तीन दिनसम्म सञ्चालन भएको तालिममा अचार उत्पादनका विभिन्न विधि, खाद्य स्वच्छता, भण्डारण तथा बजारीकरणसम्बन्धी विषयमा व्यावहारिक प्रशिक्षण प्रदान गरिएको थियो। समापन कार्यक्रममा सहभागीहरूलाई प्रमाणपत्रसमेत वितरण गरिएको आयोजकले जनाएको छ।
